Jon Domenic Parolini, schef dal Departament d'educaziun, cultura e protecziun da l'ambient

«La Scola auta spezialisada dal Grischun (SAS Grischun) festivescha quest onn ses 60avel giubileum e guarda enavos loscha sin sia lunga istorgia da gronda impurtanza per il chantun Grischun. Dapi sia fundaziun sco Tecnicum da la saira Cuira han raits regiunalas, chantunalas ed interchantunalas adina giugà ina rolla impurtanta per l'instituziun da furmaziun e promovì considerablamain ses svilup a la scola auta spezialisada independenta ch'ella è oz.
La collavuraziun stretga cun different:as partenari:as ed instituziuns ha gidà a sviluppar la SAS Grischun ad in'instituziun da furmaziun impurtanta ed in motor per innovaziun e svilup en la regiun. Questas raits pussibiliteschan il barat da savida, experientschas e resursas tranter scola auta spezialisada, economia, perscrutaziun e societad.
En vista al grond spectrum da raits impurtantas che la SAS Grischun tgira cun grond engaschament n'èsi betg simpel da numnar intgins exempels extraordinaris. Tuttina vi jau menziunar ina rait che ha sveglià spezialmain mes interess.

Cun endrizzar lavuratoris reals en regiuns sco la Bregaglia («Bregaglia Lab») ed en Surselva («Surselva Lab») rinforza la SAS Grischun la collavuraziun tranter emprendissadi, perscrutaziun e pratica ed il transfer da savida ch'è uschè impurtant per cumbatter la mancanza da persunal qualifitgà. Quests lavuratoris reals porschan ina plattafurma per sviluppar ensemen cun actur:as regiunal:as e local:as schliaziuns per l'avegnir e da generar ina plivalur sociala, economica ed ecologica per ils spazis da viver ed ils spazis economics. Talas raits promovan in svilup regiunal persistent e servan sco interfatscha tranter perscrutaziun e pratica.
In'ulteriura rait grondiusa è la «Innovators Challenge» da la SAS Grischun. Ella pussibilitescha a las studentas ed als students da collavurar durant in semester a moda directa cun la pratica per pudair perscrutar a maun da projects innovativs – da l'idea al prototip u dal prototip a la madirezza da martgà. Studentas e students dal stgalim da bachelor e master lavuran a moda interdisciplinara vi da projects innovativs reals da partenaris da l'economia e furman in team da project ensemen cun collavuraturas e collavuraturs da l'incumbensader. Era questa collavuraziun rinforza il transfer da savida en las regiuns.
Talas ed ulteriuras raits multifaras e partenadis èn e vegnan er en l'avegnir ad esser ina part essenziala da l'istorgia da success da la SAS Grischun. Ellas han gidà a promover il svilup regiunal, a rinforzar l'orientaziun a la pratica da las scolaziuns ed a porscher a las studentas ed als students in ambient d'emprender prezius.
A la SAS Grischun gratulesch jau cordialmain per ses 60avel onn d'existenza ed encuraschesch ella dad er en l'avegnir sa concentrar sin sias raits existentas sco era da crear novas per promover l'innovaziun, la creschientscha ed il svilup persistent en la regiun.»