Brigitta M. Gadient, presidenta dal cussegl da la SAS Grischun

«La Scola auta spezialisada dal Grischun è sa sviluppada ils ultims 60 onns ad ina da las pli impurtantas instituziuns da furmaziun da la regiun ed ad in juvel en la cuntrada da scolas autas svizras. Per l'economia en il chantun Grischun surpiglia ella oz in'impurtanta funcziun d'antenna. Sin basa da sia orientaziun naziunala e sia experientscha internaziunala en la perscrutaziun po ella dar impuls a projects regiunals ed uschia contribuir a l'augment da la cumpetitivitad economica. Il medem mument sa profilescha ella cun sia purschida da studis da bachelor e master e sia purschida da perfecziunaments. Pertge mo grazia a las purschidas da nischa per part unicas che resguardan ils basegns da la regiun e che s'orienteschan a la Svizra po ella insumma crescher e sviluppar e porscher studis multifars adattads era per persunas giuvnas en il chantun. Cun studis che sulettamain ella porscha en Svizra attira la SAS Grischun plinavant era studentas e students d'ordaifer il chantun. Quels studegian savens parallelamain a l'activitad professiunala e lavuran tar in'interpresa en il Grischun. Uschia contribuescha nossa scola auta spezialisada ad in «braingain» ch'è da gronda impurtanza per il Grischun. In tschintgavel da las absolventas ed ils absolvents resta suenter il studi en il chantun – ed entant èn in tschintgavel da tut las studentas ed ils students Grischunas e Grischuns. Cun la structura speziala da temp parzial en ils percurs da studi pussibilitescha la SAS Grischun er a las studentas ed als students da viver en las valladas e tuttina absolver in studi. Cun numerusas cunvegnas da cooperaziun manifesteschan las interpresas regiunalas plinavant che la purschida da studis correspunda a lur basegns. La SAS Grischun garantescha cun quai da proveder il martgà da lavur cun persunal dal fatg e persunas da cader sco era savida d'interpresa, e quai a moda multifara che correspunda a la structura ed al svilup. Per in'economia sauna e creschenta è in'activitad innovativa multifara indispensabla. Il chantun Grischun ha qua bler potenzial, è dentant era dumandà spezialmain sco chantun muntagnard en la periferia. In dals facturs decisivs è en quest connex ina buna colliaziun tranter l'emprendissadi, l'industria e la perscrutaziun. Perquai schlargiain nus d'in cuntin nossas raits cun interpresas localas, ma era naziunalas e cun instituziuns da perscrutaziun sco era l'administraziun. Nossa scola auta surpiglia qua ina funcziun da scharnier per il chantun: enragischaziun regiunala, muntada naziunala e radiaziun internaziunala.»