Survista
Francada en il Grischun, renconuschida sin plaun naziunal, stimada sin plaun internaziunal
La SAS Grischun è in center da cumpetenzas innovativ e damai ina partenaria fidada per interpresas e l'administraziun. Las experientschas sin nivel naziunal ed internaziunal èn decisivas, per che la SAS Grischun possia agir efficaziamain en la regiun. La Scola auta spezialisada dal Grischun ha elavurà ils ultims onns var 300 projects da perscrutaziun. Uschia po ella transferir savida e parter sias experientschas cun il chantun Grischun – en il senn da sia funcziun d'antenna ch'ella surpiglia en quel connex. Las enconuschientschas or da la perscrutaziun applitgada vegnan en pli integradas en las purschidas da studis e garanteschan uschia l'actualitad e la qualitad dal studi.
La SAS Grischun porscha grondas schanzas per las giuvnas ed ils giuvens dal Grischun. Grazia a la structura particulara a temp parzial pussibilitain nus a las studentas ed als students da lavurar e da viver en lur valladas e da tuttina frequentar in studi a Cuira a moda cumpacta cun dus dis da preschientscha l'emna. Plinavant han ins la pussaivladad da profitar da purschidas da perfecziunament multifaras sco per exempel il curs cun certificat Transfurmaziun digitala, il qual è concepì aposta per ils basegns dal Grischun.
Pervi da sia posiziun en il center da las Alps, davent da las metropolas, è la SAS Grischun gia adina stada dumandada d'avair ideas e purschidas pli innovativas. La scola auta considerescha sco privilegi il svilup d'ideas pli «exigentas» en favur dal success. Dasper quest spiert da pionier han societads alpinas gia stuì sa fidar ina da l'autra en il passà e collavurar per pudair subsister en quest conturn. La solidaritad vivida e la cultura cun las trais linguas rumantsch, tudestg e talian èn caracteristicas essenzialas da la DNA grischuna.
La SAS Grischun contribuescha a la cumpetitivitad da la regiun e procura per in profit sur ils cunfins cun surpigliar – cun sias purschidas da studis e sco patruna – ina rolla impurtanta areguard la reducziun da la mancanza da persunal qualifitgà e l'augment da la forza innovativa. La scola auta spezialisada motivescha umans da vegnir a star en il Grischun e fraina uschia il brain-drain smanatschant. In tschintgavel da las studentas e dals students da la SAS Grischun deriva dal Grischun ed in tschintgavel da las absolventas e dals absolvents resta suenter la finiziun dal studi en manaschis grischuns.
A la SAS Grischun stat er a cor la promoziun da las giuvnas Grischunas e dals giuvens Grischuns. Ella s'engascha correspundentamain en differents projects per la nova generaziun (da perscrutadras e perscrutaders).
L'uni per tuttas e tuts
Tge è glisch? Pertge sgola in aviun? La «Uni per tuttas e tuts» è ina retscha d'occurrenzas da la SAS Grischun per uffants e creschids, en il rom da la quala vegnan declerads e preschentads temas scientifics a moda bain chapibla e datiers da la pratica. Vegni sperasvi!
Scuvrir ussa (colliaziun a la pagina tudestga)
Dis da la tecnica
La SAS Grischun organisescha mintg'onn durant l'ultima emna da las vacanzas ils Dis da la tecnica. Durant dus dis pon las scolaras ed ils scolars empruvar, schebain ellas ed els han plaschair da lavurs tecnicas. Ins po realisar pitschens projects en differents secturs.
Scuvrir ussa (colliaziun a la pagina tudestga)
Di naziunal da l'avegnir
Il Di naziunal da l'avegnir faschain nus propostas concretas a las mattas ed als mats per pussibilitar ad els ina nova perspectiva e per laschar scuvrir els lur perspectivas multifaras futuras. En il rom da differents projects han scolaras e scolars da la 5avla fin 7avla classa la chaschun da scuvrir professiuns e models per la vita che vegnan considerads tradiziunalmain sco nunusitads per la schlattaina.
Scuvrir ussa (colliaziun a la pagina tudestga)
MINT-Academy
Sco partenaria da la Mint-Academy è la SAS Grischun responsabla per il sectur da las scienzas natiralas. Ils curs sa drizzan ad uffants da 9 fin 12 onns ed intermedieschan savida tecnica fundada a las spezialistas ed als spezialists da MINT futurs.
Scuvrir ussa (colliaziun a la pagina tudestga)
La furmaziun e perscrutaziun universitara pon, ensemen cun lur valurs directas en favur da l'attractivitad da la regiun, daventar per l'economia publica er ina branscha independenta cun in'auta valurisaziun. Quai mussa l'impurtanza che la SAS Grischun ha ord vista economica per il chantun che survegn enavos, tenor in studi da l'onn 2022, brutto CHF 4.30 per mintga franc ch'el ha investì.
Cunvegna da prestaziun dal chantun Grischun
Cunvegna da prestaziun (colliaziun a la pagina tudestga) da la regenza dal chantun Grischun cun contribuziun globala a la SAS Grischun per la perioda 2021 fin 2024.
Strategia da la scola auta e da la perscrutaziun dal chantun Grischun
Sin il sis champs da profil turissem ed economia, resursas e privels da la natira, tecnologias-clav, cultura e diversitad, Life Science e Computational Science offra la SAS Grischun purschidas da studi e da perfecziunament e realisescha projects da perscrutaziun e da servetschs tenor la strategia da la scola auta e da la perscrutaziun dal chantun Grischun. La SAS Grischun è cunzunt activa sin ils champs turissem ed economia, tecnologias-clav e Computational Science, ma ella sustegna er ils secturs resursas e privels da la natira, cultura e diversitad sco era Life Science.
Ulteriurs mandats dal chantun Grischun
Ultra da las finamiras definidas en la cunvegna da prestaziun ademplescha la SAS Grischun ulteriurs mandats per il chantun:
Center IPM Grischun
Il Center per interpresas pitschnas e mesaunas dal Grischun (Center IPM Grischun) è l'emprim post da consultaziun per IPMs, start-ups ed interpresas giuvnas dal chantun che vulan prender per mauns insatge nov, optimar lur manaschi u augmentar l'effizienza.
Scuvrir ussa (colliaziun a la pagina tudestga)
Apero d'energia
L'Apero d'energia Grischun porscha regularmain referats dal fatg ad in public che s'interessa per temas d'energia sco l'effizienza energetica u las energias regenerablas ed er autras actualitads da relevanza energetica. L'occurrenza ha lieu quatter giadas l'onn e vegn transmessa en directa da Cuira a Poschiavo.
Scuvrir ussa (colliaziun a la pagina tudestga)
La Lescha davart las abitaziuns secundaras
La Lescha davart las abitaziuns secundaras (LAS) è en vigur dapi il 1. da schaner 2016. Sias consequenzas per las regiuns alpinas èn d'auta relevanza e sveglian differentas dumondas, a las qualas la SAS Grischun sa deditgescha.
Scuvrir ussa (colliaziun a la pagina tudestga)
Studi e perfecziunament
Il studi sco perspectiva
La SAS Grischun offra purschidas da studis orientadas vers l'avegnir en management e turissem, en Computational Science sco er en tecnologias-clav selecziunadas (p.ex. Photonics, Data Visualization, User Experience Design, Multimedia Production). Cun sias purschidas da studis ha la SAS Grischun adina puspè mess sin il martgà ils ultims onns concepts da studi efficazis che adempleschan ils basegns da las interpresas regiunalas e che fan frunt a l'emigraziun da giuvnas Grischunas e da giuvens Grischuns – e quai sco purschidas singularas en tut la Svizra e senza concurrenza. Malgrà il regress demografic reusseschi a la SAS Grischun da scolar adina dapli giuvnas Grischunas e giuvens Grischuns. Passa 65 lavurs da bachelor e da master sa fatschentan mintg'onn cun in tema dal chantun Grischun ed era ulteriurs projects da studentas e students (colliaziun a la pagina tudestga) u l'Innovators Challenge promovan manaschis regiunals.
In perfecziunament a la SAS Grischun è datiers da la pratica. Cunquai che la Scola auta spezialisada dal Grischun collavura stretgamain cun l'economia respectivamain cun las branschas correspundentas, intermediescha ella la savida che glieud da professiun dovra en la pratica. Il program da perfecziunament promova cun cleras finamiras las persunas en lur svilup professiunal. Tut ils perfecziunaments vegnan purschids cumplementarmain a la professiun. Las purschidas da perfecziunament èn diploms cun ils titels Executive Master of Business Administration (EMBA), Master of Advanced Studies (MAS), Diploma of Advanced Studies (DAS), Certificate of Advanced Studies (CAS) sco era certificats professiunals e curs.
Purschidas da bachelor a la SAS Grischun
En il studi da bachelor (colliaziun a la pagina tudestga) a la SAS Grischun acquistais Vus la savida pratica professiunala e las abilitads necessarias per dumagnar pretensiuns professiunalas exigentas. Scuvri nossas numerusas purschidas da bachelor.
Purschidas da master a la SAS Grischun
Il studi da master (colliaziun a la pagina tudestga) dura dus fin quatter semesters. In studi da bachelor preliminar è stringentamain necessari. En il rom dal studi da master approfundais Vus a moda scientifica il studi precedent ubain As deditgais a novs champs da savida.
Perfecziunament a la SAS Grischun
Faschai a la SAS Grischun ina scolaziun cumplementara a la professiun (colliaziun a la pagina tudestga). La purschida da perfecziunaments è multifara e Vus pudais eleger tranter divers diploms sco p.ex. Executive MBA, Masters of Advanced Studies (MAS), Diploma of Advanced Studies (DAS), Certificates of Advanced Studies (CAS) u era curs professiunals.
Perscrutaziun ed innovaziun per il Grischun
La SAS Grischun contribuescha essenzialmain al svilup economic, social e persistent dal chantun Grischun. Ella realisescha mintg'onn var 65 projects da perscrutaziun en manaschis dal Grischun e 12 projects da perscrutaziun en l'administraziun chantunala. En pli ha ella inizià emprims laboratoris reals per rinforzar anc pli fitg la collavuraziun da la scola auta spezialisada cun las regiuns.
A la SAS Grischun statti però er a cor da rinforzar las interpresas da turissem impurtantas per il chantun areguard la valurisaziun. La pandemia ha gì in effect accelerant sin la midada digitala inevitabla, cun la quala la branscha sto s'occupar per optimar la purschida locala e la distribuziun da la dumonda internaziunala.
Il center DAViS (colliaziun a la pagina tudestga) (center da High-Performance-Computing) e la colliaziun cun il Center svizzer da calculaziun scientifica CSCS a Lugano èn infrastructuras impurtantas per la cuntrada da scolas autas e da perscrutaziun dal Grischun. Ensemen cun l'Institut svizzer da retschertgas davart allergias ed asma (ISRA) a Tavau concentrescha e sustegna il center da cumpetenza regiunal da la SAS Grischun la perscrutaziun, l'industria e l'instrucziun sin ils secturs da l'analisa da datas e da la calculaziun scientifica – e quai per incumbensa dal chantun Grischun e da sia professura speziala correspundenta.
La SAS Grischun realisescha blers projects da perscrutaziun per il chantun Grischun u realisescha quels ensemen cun partenaris chantunals.
Servetschs per il Grischun
La SAS Grischun sustegna manaschis ed instituziuns cun sias enconuschientschas e sia expertisa e metta er a disposiziun l'infrastructura necessaria. Ultra dal servetsch da cussegliaziun metta ella er a disposiziun l'infrastructura dals laboratoris. Il Center per interpresas pitschnas e mesaunas dal Grischun (Center IPM Grischun) sustegna e cusseglia IPMs, start-ups ed interpresas giuvnas en dumondas d'economia da manaschi che concernan la fundaziun e la creschientscha d'ina interpresa sco era la finanziaziun, il management strategic, l'innovaziun e l'internaziunalisaziun.
Servetschs per manaschis regiunals
Scuvrir ussa (colliaziun a la pagina tudestga)
Patruna
Ina patruna impurtanta per il chantun
La SAS Grischun occupa en total var 700 collavuraturas e collavuraturs, da quellas e quels èn passa 300 collavuraturas e collavuraturs stabels. Ils ultims onns han ins creà passa 200 novas plazzas. Ultra dals engaschaments fixs porscha la scola auta a numerusas spezialistas ed a numerus spezialists da manaschis grischuns la pussaivladad da lavurar sco docentas e docents en il rom da las purschidas da scolaziun e da perfecziunament e d'intermediar lur savida pratica actuala a las studentas ed als students.
Dal 2004, la Scuola universitaria professionale dei Grigioni organizza inoltre tirocini in diversi ambiti che offrono a studentesse e studenti diverse e interessanti opportunità di formazione per le professioni di costruttrice/costruttore di plastici architettonici (link alla pagina in tedesco), operatrice/operatore di edifici e infrastrutture (indirizzo di servizio di portineria) (link alla pagina in tedesco), gestrice/gestore dell’informazione e della documentazione, informatica/informatico (indirizzo di informatica aziendale) (link alla pagina in tedesco) e impiegata/impiegato di commercio (link alla pagina in tedesco).
Plinavant porscha la SAS Grischun dapi il 2004 plazzas d'emprendissadi en differents secturs. Las emprendistas ed ils emprendists absolvan ina furmaziun interessanta e variada en las tschintg professiuns constructura/constructur da models architectonics (colliaziun a la pagina tudestga), spezialista/spezialist per il mantegniment dal manaschi (direcziun servetsch en chasa) (colliaziun a la pagina tudestga), spezialista/spezialist infurmaziun e documentaziun (colliaziun a la pagina tudestga), informaticra/informaticher (direcziun informatica da manaschi) (colliaziun a la pagina tudestga) e commerzianta/commerziant (colliaziun a la pagina tudestga).
Collavuraziuns
Collavuraziun sin nivel chantunal
Ultra da sias collavuraturas e da ses collavuraturs sco era da sia purschida da furmaziun e da perscrutaziun èn las collavuraziuns in impurtant factur da success per la SAS Grischun. En connex cun las autoritads signifitga quai da garantir cundiziuns da basa optimalas a lung termin. Ensemen cun ils partenaris da project da l'economia, da l'administraziun e da las scolas autas vul ins sviluppar purschidas relevantas ed orientadas vers l'avegnir.
Collavuraziuns tschernidas en la cuntrada da perscrutaziun e furmaziun dal Grischun
Academia Engiadina
L’Academia Engiadina è in institut da scolaziun a Samedan en l'Engiadin'Ota. Sia purschida cumpiglia la scola media, la Scola spezialisada superiura da turissem dal Grischun, il Center da glaziologia applitgada ed il Center regiunal da perfecziunament.
Academia Raetica
L’Academia Raetica è l'organisaziun tetgala e da referiment per la perscrutaziun e la furmaziun universitara en il Grischun. Ella unescha 24 instituziuns fitg qualifitgadas dals secturs medischina, tecnica, scienzas natiralas e scienzas umanas e socialas. Sia finamira è da rinforzar il svilup dal Grischun sco plazza da perscrutaziun, da promover la collavuraziun da las instituziuns localas ina cun l'autra e cun l'economia e d'esser in post d'infurmaziun per l'administraziun, la politica e la publicitad.
AlpEnForCe
Il Center alpin per la perscrutaziun d'energia AlpEnForCe è ina fundaziun da perscrutaziun cun sedia e domicil a Mustér che promova – per cumenzar en il chantun Grischun – la perscrutaziun interdisciplinara da l'energia cun resguardar spezialmain ils chantuns da muntogna e las regiuns alpinas.
El s'occupa tranter auter cun dumondas tecnicas, economicas, giuridicas e politicas en connex cun la tematica da l'energia en il spazi alpin e lavura tant cun instituziuns da perscrutaziun naziunalas ed internaziunalas sco era cun partenaris cun experientscha pratica.
Uffizi per la furmaziun media-superiura UMS
L’Uffizi per la furmaziun media-superiura (UFMS) è in post da servetsch dal Departament d'educaziun, cultura e protecziun da l'ambient dal Grischun. L'UMS è responsabel per las scolas medias e per il stgalim terziar. Quel cumpiglia las scolas autas, la furmaziun professiunala superiura cun las scolas spezialisadas superiuras ed ils instituts da perscrutaziun.
Campus Grischun
Instituts da furmaziun e da perscrutaziun d'auta qualitad valan sco facturs-clav per sa posiziunar e sa far valair en la concurrenza economica.
L'Uffizi per la furmaziun media-superiura UMS administrescha e coordinescha l'entir sectur da studi e da perscrutaziun.
Campus Cuira
En la chapitala è il Campus Cuira la plattafurma cuminaivla da las suandantas scolas autas:
Campus Turissem
En il sectur dal turissem furma il Campus Turissem – furmaziun e perscrutaziun la plattafurma cuminaivla dals suandants partenaris da furmaziun:
Graduate School Grischun
La Graduate School Grischun è in'instituziun da l'Academia Raetica ed ha l'intent da promover las doctorandas ed ils doctorands sco era las postdoctorandas ed ils postdoctorands activs en il Grischun. Ella s'engascha per la furmaziun ed il perfecziunament, per meglierar las cundiziuns da viver e da lavurar e per colliar las perscrutadras giuvnas ed ils perscrutaders giuvens cun las universitads svizras. Plinavant promova ella la publicaziun e la renconuschientscha da las prestaziuns da la nova generaziun da perscrutadras e da perscrutaders dal Grischun.
ibW Scola spezialisada superiura da la Svizra Sidorientala
L'ibW Scola spezialisada superiura da la Svizra Sidorientala è ina da las scolas spezialisadas superiuras excellentas da la Svizra sin il sectur dal perfecziunament da persunal spezialisà e da persunas directivas orientadas a l'acziun. Per che nossas studentas e noss students sajan fittas e fits per il futur, investin nus cuntinuadamain en l'optimaziun dals cuntegns d'instrucziun, da las metodas d'instrucziun, dal svilup da las cumpetenzas e dal transfer pratic.
Scola auta da pedagogia dal Grischun SAP
La Scola auta da pedagogia dal Grischun SAP scolescha persunas d'instrucziun per la scola populara. Ella promova en pli l'ulteriur svilup professiunal da las persunas d'instrucziun cun resguardar la perscrutaziun ed il svilup spezialisà e da la didactica dal rom. La Scola auta da pedagogia dal Grischun perscrutescha en il sectur dals suandants temas d'accent: «plurilinguitad», «scola alpina» e «scola e tecnica». Quels accents da perscrutaziun stattan per la singularitad da la scola auta en la cuntrada academica.
Scola auta da teologia Cuira SAT
Sco instituziun universitara purtada da la baselgia è la Scola auta da teologia Cuira SAT obligada ad ina perscrutaziun ed instrucziun d'auta qualitad. Ella pratitgescha ina teologia academica actuala che sa basa sin experientschas praticas e concretas. La SAT è in lieu da reflexiun scientifica e da furmaziun teologica. Cun intermediar las cumpetenzas necessarias per in'activitad teologica responsabla en la baselgia ed en la societad qualifitgescha ella las studentas ed ils students per in'incumbensa pastorala. Sco institut da perscrutaziun sustegna ella l'expressiun libra dals interess scientifics, accumpogna giuvnas perscrutadras e giuvens perscrutaders a lur qualificaziun scientifica e s'engascha per il transfer scientific teologic en baselgia e societad.
THIM
THIM è ina pitschna scola auta en il chantun Grischun che sa deditgescha cumplainamain a la fisioterapia. Ella è vegnida fundada l'onn 1990 sco succursala da la scola auta internaziunala per fisioterapia Thim van der Laan en ils Pajais Bass ed è stada l'emprima scola svizra che ha offert il bachelor en il sectur da la fisioterapia.
Collavuraziuns tschernidas cun manaschis ed administraziuns chantunalas
Occurrenzas
La SAS Grischun surpiglia en il rom dal transfer da savida e da tecnologia ina funcziun d'antenna: ella registrescha enconuschientschas scientificas d'ordaifer e las transmetta a moda elavurada a l'economia ed a l'administraziun regiunala sco er a la populaziun. Uschia pon quellas profitar da diversas occurrenzas (colliaziun a la pagina tudestga).