En in'egliada
Grazia al Center da scola auta spezialisada, il project da pliras generaziuns, vegn la SAS Grischun ad esser architectonicamain preschenta ed uschia visibla a la fin da questa perioda strategica. Ina scola auta spezialisada che collavura stretgamain cun las gruppas en mira regiunalas, ch'è enconuschenta e renconuschida naziunalmain sco scola auta spezialisada cun clers accents e che ha pudì dar emprims signals internaziunalas.
Per pudair servir a l'economia e la societad vulain nus rinforzar a lunga vista las cumpetenzas centralas da la furmaziun sin nivel da scola auta. Quai capita cun sviluppar vinavant e da nov la purschida da studis. Nus generain savida da la perscrutaziun e la pratica, la quala nus pudain lura puspè dar vinavant a las studentas ed als students.
Finamiras strategicas
Promoziun da la nova generaziun (economia/societad)
Nus promovain a moda focussada la nova generaziun da persunal qualifitgà e persunas da cader per l'economia e la societad che duain furmar e realisar cun success models persistents ed innovaziuns.
Soluziun da problems cumplessiva (studentas e students)
Nossas studentas e noss students emprendan d'elavurar a moda cumplessiva problems en in conturn che sa mida fitg svelt e da nizzegiar lur savida, lur abilitads praticas e lur cumpetenzas per sviluppar e realisar soluziuns per problems da relevanza economica e da la societad a moda orientada vers l'avegnir.
Svilup persistent (il cuntegn da la colliaziun è tudestg)
Expertas ed experts colliad:as (collavuraturas e collavuraturs)
Nus attirain talents qualifitgads en la scolaziun, la perscrutaziun, l'organisaziun e la direcziun e sviluppain el:las ad expertas ed experts renconuschid:as, colliad:as ed orientad:as internaziunalmain.
Lavurar a la SAS Grischun (il cuntegn da la colliaziun è tudestg)
Spezialisaziuns attractivas (scolaziun/perfecziunament)
Nus essan renumads pervi da nossas spezialisaziuns attractivas e noss formats da scolaziun moderns ed orientads al svilup.
Studegiar a la SAS Grischun (il cuntegn da la colliaziun è tudestg)
Perscrutaziun orientada a l'applicaziun (perscrutaziun/servetsch)
Nus essan enconuschents naziunalmain ed internaziunalmain per nossa perscrutaziun orientada a l'applicaziun.
Accents tematics da la SAS Grischun (il cuntegn da la colliaziun è tudestg)
Direcziun/resursas/communicaziun
Nus vivain ina cultura da manar, da lavurar e da cooperar pragmatica ed agila en tut ils champs da la vita che s’orientescha tenor la qualitad. En il rom dals meds disponibels impundain nus optimalmain nossas resursas finanzialas per ademplir las pretensiuns fatgas envers nus en tut ils secturs da prestaziun. Il medem mument faschain nus attenziun d'avair in bun equiliber tranter custs administrativs e custs da persunal. Nus communitgain noss messadis centrals a tut nossas gruppas en mira.
Il magazin da la scola auta «Wissensplatz» (il cuntegn da la colliaziun è tudestg)
Accents da svilup
Cun ils quatter accents da svilup resguardain nus tant aspects da la coordinaziun politica naziunala d'instrucziun superiura (il cuntegn da la colliaziun è tudestg), ils accents dal program da la Regenza 2025-2028 sco era la strategia chantunala da scola auta e da perscrutaziun.
Motor d'innovaziun
En nossa rolla sco motor d'innovaziun vulain nus contribuir nossa part per reducir la mancanza da persunal qualifitgà en la tecnica e l'IT. Cun nossa perscrutaziun focussada en la tecnica e l'IT vegnin nus a sviluppar projects da signal centrals e cun nossa rolla sco motor d'innovaziun vegnin nus er ad intensivar il transfer da savida e da tecnologias. Plinavant rinforzain nus la posiziun dominanta en ils champs da profil «tecnologias-clav» e «Computational Science» da la strategia chantunala da scola auta e da perscrutaziun.
Accent tematic tecnologias futuras applitgadas (il cuntegn da la colliaziun è tudestg)
Svilup economic da spazis alpins
Cun il focus sin il svilup economic da spazis alpins vulain nus gidar a reducir la mancanza da persunal qualifitgà e promover la forza innovativa per augmentar la cumpetitivitad da las interpresas en spazis alpins. Era cun schlargiar raits vul la SAS Grischun augmentar sia rolla directiva en il turissem e cun quai en il champ tematic «turissem ed economia» da la strategia chantunala da scola auta e da perscrutaziun. Plinavant duai nossa posiziun en las disciplinas economicas vegnir rinforzada ulteriuramain per pudair avrir ils potenzials extraordinaris dal spazi alpin.
Accent tematic agir d'interpresa (il cuntegn da la colliaziun è tudestg)
Provediment integrà da spazis alpins
Cun stgaffir il champ spezial sanadad e crear ina purschida da studi en il champ da la sanadad publica, cun la specificaziun d'in chantun muntagnard decentral e pauc populà, vulain nus cumbatter directamain la mancanza da persunal qualifitgà en la tgira. Ulteriuras purschidas da studi e da perfecziunament en il champ da la sanadad contribueschan communablamain ad in'activitad da perscrutaziun per sviluppar noss nov champ spezial.
Accent tematic svilup en il spazi alpin (il cuntegn da la colliaziun è tudestg)
Augment da l'attractivitad
Per pudair ademplir ils basegns actuals e futurs da las studentas e dals students concernent l'infrastructura ed ils formats da studi, prendain nus sut la marella mesiras da la scola auta e dal svilup da qualitad strategic dals champs direcziun, furmaziun sin nivel da scola auta, transfer da savida e da tecnologia, sco era resursas e communicaziun. Era la bardigliada en il Center da scola auta spezialisada il 2028 vegn a contribuir fermamain a l'attractivitad da nossa scola auta.
Temas traversals
Nus ans posiziunain sco scola auta innovativa, persistenta ed averta che sa deditgescha interdisciplinarmain a l'intelligenza artifiziala ed a la digitalisaziun sco era a la diversitad.
Innovaziun
Innovaziuns decidan davart il success. Quai cumpiglia l'entir process da l'idea fin a la realisaziun pronta per il martgà. In'idea è numnadamain pir effectiva, sch’ella è vegnida realisada cun success sin il martgà. En l'ecosistem da las innovaziuns ans vesain nus sco motor da l'innovaziun en spezial da las interpresas pitschnas e mesaunas. Ditg concret portan nossas absolventas e noss absolvents las cumpetenzas per innovaziuns en las interpresas, porschan noss resultats da la perscrutaziun ina basa effectiva per il svilup e gidan noss servetschs per start-ups ed interpresas etablidas a sviluppar cumpetenzas en il rom dal transfer da savida e tecnologia.
Innovaziun (il cuntegn da la colliaziun è tudestg)
Svilup persistent
Il svilup general da la scola auta s’orientescha al svilup persistent. En quel connex ans basain nus sin ils 17 «Sustainable Development Goals» (SDG) che las Naziuns Unidas han deliberà. Il svilup persistent è tenor nossa chapientscha in’avischinaziun integrada en las incumbensas da management e support ed en ils champs dal transfer da savida e da la tecnologia, da la perscrutaziun e dal svilup sco era dals servetschs e da la furmaziun sin nivel da scola auta. Nus n'agin betg a moda isolada ed unidimensiunala, mabain resguardain ils effects reciprocs tranter las dimensiuns ambient, economia e societad.
Svilup persistent (il cuntegn da la colliaziun è tudestg)
Intelligenza artifiziala e digitalisaziun
L'intelligenza artifizial è ina midada relevanta e consequentamain ina gronda sfida per l'economia e la societad, per las qualas nus vulain realisar soluziuns. Nossa perscrutaziun orientada a la pratica davart l'intelligenza artifiziala tracta sfidas socialas ed economicas: da la meglieraziun da proceders diagnostics en il sectur da la sanadad fin a l’optimaziun da process en l'industria. En las purschidas da studis e perfecziunaments intermediain nus savida teoretica fundada e know-how pratic per l'applicaziun da l'intelligenza artifiziala. Uschia preparain nus la proxima generaziun d'expertas e d'experts d'IA per il futur. Ultra da quai promovain nus en quest tema traversal la digitalisaziun per lung da noss process.
IA e digitalisaziun (il cuntegn da la colliaziun è tudestg)
Diversitad
Nus na chapin las mesiras per promover la diversitad betg sco obligaziun legala che sto vegnir ademplida, mabain sco in grond potenzial da schanzas orientà vers l'avegnir. Nus stimain la diversitad da persunalitads ed abilitads, cun sias communabladads e differenzas. Inclusiun munta per nus che mintgina e mintgin entaifer la communitad da tut las scolas autas po participar a moda activa, eguala ed autodeterminada a las activitads ed al svilup instituziunal.
Diversitad (il cuntegn da la colliaziun è tudestg)
Open Science
Open Science signifitga in access simplifitgà a publicaziuns scientificas, datas e cuntegns. Cun la fixaziun strategica dad Open Science promovain nus ina meglra visibilitad naziunala ed internaziunala da la perscrutaziun («Open Access» ed «Open Data») e da la scolaziun («Open Educational Resources»). Plinavant rinforzain nus la collavuraziun tant entaifer la scola auta sco er ordaifer a maun da cooperaziuns interdisciplinaras. Medemamain vulain nus tgirar in'utilisaziun adequata e responsabla da cuntegns e datas confidenzialas u da valur commerziala, er en collavuraziun cun l'economia privata en il rom da la perscrutaziun applitgada.