«Ils studis mussan che las senioras ed ils seniors s'engaschan fermamain a favur da la societad civila e ch'els èn uschia ina pitga impurtanta per il stadi e la societad. La rolla da la vischnanca che pussibilitescha e promova in tal engaschi, han ins però fin ussa strusch examinà», di Dario Wellinger, manader da project al center da management public da la SAS Grischun. «Cun noss project da perscrutaziun avain nus per l'emprima giada dumandà senioras e seniors en l'entira Svizra, schebain els s'engaschan a favur da la societad civila e co ch'els valiteschan las mesiras communalas.» Ils resultats pon gidar a sviluppar vinavant la politica da vegliadetgna en las vischnancas.

Senioras e seniors bain integrads cun grond potenzial

Il project da perscrutaziun è vegnì realisà da la SAS Grischun ensemen cun la Pro Senectute e sustegnì da la Fundaziun Beisheim, dal Pertschient cultural Migros e da la Fundaziun Walder. En il rom dal project han ins fatg in'enquista naziunala represchentativa cun var 580 persunas en la vegliadetgna da 55 fin 85 onns ed ina retscha d'intervistas cun expertas ed experts da vischnancas, d'interpresas e da la scienza. Ils resultats mussan in maletg legraivel: las persunas interrogadas sa sentan bain integradas tant en la societad sco er en la politica da lur vischnanca da domicil. In pau surprendent è l'aut dumber da persunas che s'engaschan – quai èn 48% pertschient da tut las participantas e tut ils participants. Questa part sa reducescha mo minimalmain en la vegliadetgna pli avanzada.

Il studi ha repartì las persunas interrogadas en quatter tips. Quels sa differenzieschan concernent lur engaschament actual e lur giavisch da s'engaschar er en l'avegnir. 20 pertschient fan part da las persunas (1) «sa retratgas», v.d. persunas che na s'engaschan actualmain betg e na tschertgan era betg in engaschi. 7 pertschient fan part da la categoria (2) «bloomers» che s'engaschan oz, ma che na giavischan en l'avegnir nagin engaschi supplementar. Alura datti anc 32 pertschient en la categoria (3) «segns da dumonda». Quai èn persunas che na s'engaschan betg, ma che pudessan s'imaginar da s'engaschar en l'avegnir. Ulteriurs 41 pertschient fan part dals (4) «stars», v.d. persunas che s'engaschan actualmain e che vulan s'engaschar er en l'avegnir.

Sa gidar cun vischinas e vischins è popular, surpigliar in uffizi politic nunpopular

Las senioras ed ils seniors interrogads pudessan s'imaginar bain da sa participar en l'avegnir a l'agid a vischinas e vischins, da sustegnair autras persunas en dumondas administrativas e da collavurar en projects che collian las generaziuns. Sco il pli nunpopular considereschan las senioras ed ils seniors interrogads in engaschi politic en lur vischnanca. Quai mussa ina giada dapli quant difficil ch'igl è da mobilisar resursas per il sistem da milissa politic. En la gruppa da vegliadetgna da 65-85 onns exerciteschan main che 5 pertschient in uffizi politic sin plaun communal e strusch ina persuna in uffizi sin plaun regiunal u chantunal. Quai cuntradi al narrativ da l'inveteraziun da la politica, derasà en las medias ed en la publicitad. Percunter èsi sa mussà: era per la gruppa da vegliadetgna da 75-85 onns, pia la part da la populaziun la pli veglia che ha participà a l'enquista, è in dals motivs principals per l'engaschi il giavisch da gidar a concepir l'avegnir; el è mo pauc pli exprimì che tar la gruppa da vegliadetgna la pli giuvna da las persunas tranter 55 e 64 onns.

La toolbox gida a sviluppar vinavant la politica da vegliadetgna

Las lavurs da perscrutaziun han mussà che las vischnancas duessan daventar pli creativas quai che reguarda lur politica da vegliadetgna e tegnair en egl meglier il potenzial da las abitantas e dals abitants attempads. Ellas stuessan adattar ed individualisar las furmas d'engaschament communalas (p.ex. en furma da gruppas da lavur ibridas) per satisfar a las pretensiuns da las persunas sur 65 onns che vulessan s'engaschar a moda flexibla e per in temp limità. Cun communitgar meglier las mesiras existentas pudessan las vischnancas era metter lur politica da vegliadetgna sin ina basa pli vasta. En il rom dal project han ins sviluppà ina toolbox cun material per lavuratoris. Quella porscha a las vischnancas infurmaziuns ed agids metodics per sviluppar mesiras concretas en il rom da quatter lavuratoris. La toolbox è gratuita per la publicitad e duai gidar surtut vischnancas pitschnas e mesaunas a sviluppar vinavant lur politica da vegliadetgna.

Ulteriurs detagls:

• Studi e toolbox (en tudestg): plus65.fhgr.ch
• Champ da perscrutaziun (en tudestg): activitad da milissa ed activitad voluntara

Ulteriuras infurmaziuns:

SAS Grischun:
Dario Wellinger
manader da project
+41 (0)81 286 39 36
dario.wellinger@clutterfhgr.ch

Pro Senectute Svizra:
Udo Allgaier
+41 (0)44 283 89 85
udo.allgaier@clutterprosenectute.ch

Politconsulting:
Andreas Müller
cunautur
+41 (0)79 239 46 87
andreas.mueller@clutterpolitconsulting.ch