Restabiliment dal dumber da studentas novas e students novs a la SAS Grischun
18.09.2023
Il nov semester che cumenza oz porta puspè dapli studentas novas e students novs a la Scola auta spezialisada dal Grischun (SAS Grischun). Cun 674 studentas novas e students novs che fan il bachelor resp. il master consecutiv sa mida puspè la tendenza suenter dus onns ch'ils dumbers èn sa sminuids. Da las persunas immatriculadas da nov èn 19 pertschient Grischunas e Grischuns. Per l'emprima giada cumenzan 39 studentas e students il studi da master consecutiv «Digital Communication and Creative Media Production», ina purschida unica en cooperaziun cun l'Universitad da Friburg.
Da las studentas e students, tut en tut 674, èn 19 pertschient Grischunas e Grischuns. 53 pertschient èn dunnas. 525 persunas giuvnas cumenzan in studi da bachelor en architectura, inschigneria da construcziun, economia da manaschi, Computational and Data Science, Digital Business Management, Digital Supply Chain Management, Information Science, Mobile Robotics, Multimedia Production, Photonics, management da sport e turissem – l'ultim tant per tudestg sco era per englais. Quai correspunda ad in augment da studentas e students da bachelor da 10 pertschient en cumparegliaziun cun l'onn avant.
Er il dumber d'annunzias per in studi da master consecutiv è legraivel, tranter auter grazia a la nova purschida en cooperaziun cun l'Universitad da Friburg. Uschia cumenzan 39 persunas il joint master «Digital Communication and Creative Media Production». Quest studi unescha cun in focus sin l'applicaziun la savida da la scienza da la communicaziun e realisaziuns da la tecnica mediala. Las cumpetenzas da l'universitad cumbinadas cun quella da la scola auta spezialisada pussibiliteschan a las studentas ed als students da pionier in profil singular che permetta d'unir consolidaziun scientific-teoretica e know-how pratic. En Svizra tudestga è questa cumbinaziun in novum. Ulteriuras studentas novas ed ulteriurs students novs en in studi da master consecutiv – 110 en tut – sa repartan sin las purschidas existentas Data Visualization, Engineering, New Business, Sustainable Business Development, Tourism and Change – che vegn manà en englais, ed User Experience Design. Tut en tut cumenzan 149 studentas e students in studi da master consecutiv a la SAS Grischun. En tut ils studis da bachelor e da master èn immatriculads quest atun var 1819 studentas e students a la SAS Grischun.
Nus avain grond plaschair ch'il dumber da studentas novas e students novs en è creschì per 18 pertschient en cumparegliaziun cun l'onn avant. «Per ina scola auta è la collavuraziun sin stgalim naziunal ed internaziunal central per restar cumpetitiva ed al puls dal temp cun sia purschida ed uschia chattar renconuschientscha. Mo uschia po la SAS Grischun esser in avantatg maximal per il Grischun», accentuescha prof. Jürg Kessler, rectur e parsura da la direcziun da la scola auta, l'impurtanza da cooperar era cun scolas autas universitaras, sco quai che la SAS Grischun fa cun l'Universitad da Friburg en il studi da master «Digital Communication and Creative Media Production».
Dapli detagls
- Fotos dal nov semester 2023
- purschidas da bachelor da la Scola auta spezialisada dal Grischun (en tudestg): fhgr.ch/bachelor
- purschidas da master da la Scola auta spezialisada dal Grischun (en tudestg): fhgr.ch/master
datotecas
- news-fhgr-studienstart-2023.jpgPer l'emprima giada cumenzan 39 studentas e students il studi da master consecutiv «Digital Communication and Creative Media Production», ina purschida unica a la SAS Grischun en cooperaziun cun l'Universitad da Friburg.
La Scola auta spezialisada dal Grischun
Sco scola auta metta la SAS Grischun il focus sin in pensar dinamic ed in agir proactiv. Questa tenuta la gida a concepir l'avegnir a moda curaschusa e persistenta. La purschida da studis s’orientescha tenor las sfidas praticas da l’economia e da la societad. Cun sia offerta pussibilitescha ella a sias studentas ed a ses students, en tut passa 2200, da daventar persunalitads responsablas. La SAS Grischun porscha studis e perfecziunaments en ils roms «architectura ed inschigneria da construcziun», «medias, tecnica ed IT» sco er «economia, servetschs e scienza d’infurmaziun». En sia perscrutaziun interdisciplinara e transdisciplinara metta ella il focus sin ils temas tecnologias futuras applitgadas, il svilup en il spazi alpin e l'agir tenor princips d'interpresa. Cun sias activitads contribuescha la SAS Grischun al success ed a la cumpetitivitad da persunas, instituziuns e regiuns. Ella ha fermas ragischs en la regiun, è d’impurtanza naziunala ed irradiescha en l’entir mund. fhgr.ch