Dapi 60 onns il center da furmaziun dal persunal qualifitgà da damaun
23.05.2024
Il 2023 è stà per la Scola auta spezialisada dal Grischun in onn da plaschairs, ma era da sfidas: ella ha festivà ses giubileum da 60 onns, ha beneventà puspè dapli studentas e students da bachelor e da master ed avert dus ulteriurs labors reals. La scola auta ha dentant era stuì registrar in surpli d'expensas da CHF 2,7 miu. Quel è d'attribuir a la reducziun dal dumber total da studentas e students – in trend che sa fa valair en l'entira Svizra.
Per l'emprima giada dapi passa 20 onns ha la SAS Grischun registrà ina perdita. Il quint annual 2023 preschenta in surpli d'expensas da CHF 2,7 miu. La raschun è tranter auter la reducziun dal dumber total da studentas e students per 8,7 pertschient ils onns 2022 e 2023. Grazia a sias novas purschidas ha la SAS Grischun dentant era pers en questa fasa damain studentas e students che la media dal martgà. Il dumber total da las persunas che frequentan studis da bachelor e da master è sa reducì per 1,6 pertschient visavi l'onn precedent, sin plaun naziunal è quest dumber dentant sa sminuì per 5,3 pertschient en direcziuns da studi relevants per la SAS Grischun. Dapi l'atun 2023 è il dumber da studentas e students gia puspè s'augmentà. En quest semester ha cumenzà in studi il segund grond dumber da studentas e students dapi l'existenza da la Scola auta spezialisada. Era las annunzias per studis da bachelor e da master il semester d'atun 2024 èn positivas. «Jau hai particularmain plaschair che la part da las studentas e dals students cun domicil en il chantun Grischun è cun 17,6 pertschient vinavant stabila», di il rectur Jürg Kessler. El è losch che la scola gida da far frunt a la mancanza da persunal qualifitgà en il chantun Grischun.
Era sch'ils retgavs da la perscrutaziun èn sa reducids per 12,7 pertschient visavi l'onn precedent, vai puspè tendenzialmain ensi suenter ils onns da pandemia pretensius per la perscrutaziun applitgada. Las perditas en ils differents secturs da prestaziun po la SAS Grischun cuvrir cun sias reservas. Quellas ha ella dentant stuì schliar per passa la mesadad. Il rinforzament da la tecnica e da l'informatica en il Grischun, pretendì da la Regenza, ha la SAS Grischun sustegnì gia l'onn 2023 cun augmentar la contribuziun globala per CHF 1 miu. «Per amplifitgar e sviluppar vinavant sco giavischà dal Chantun questas purschidas che chaschunan gronds custs dovra la suletta scola auta spezialisada en il Grischun ulteriurs meds per ademplir sia incumbensa en favur da la societad», accentuescha Jürg Kessler. Las cifras detagliadas, ils puncts culminants e las undraziuns èn cuntegnidas en il rapport annual 2023 ed en il rapport da perscrutaziun dal matg 2024.
In giubileum e dus ulteriurs labors reals
La SAS Grischun ha festivà il 2023 ses giubileum da 60 onns. Cura ch'ella è vegnida fundada il 1963, è la mancanza da persunal qualifitgà en professiuns tecnicas stada la raschun da fundar in tal lieu da furmaziun en la regiun. Er oz è la finamira da crescher cuminaivlamain cun il chantun, l'economia e la societad il motor da la scola auta. La SAS Grischun ha ultra da quai avert dus novs labors reals: il San Bernardino Lab ed il labor en il Partenz/Tavau.
Sco mesira per cumbatter la mancanza da persunal qualifitgà en la tecnica e l'informatica ha la Scola auta spezialisada lantschà il studi da bachelor Artificial Intelligence in Software Engineering ch'è unic en Svizra e cumenza l'atun 2024. Ultra da quai ha ella cumplettà sia purschida cun il nov studi da furmaziun supplementara Business Intelligence. L'onn current vali da finalisar la planisaziun per la proxima perioda da strategia 2025–2028 ed uschia da preparar il terren per l'avegnir.
Ulteriurs detagls
- rapport annual 2023 (cun cuntegns er en rumantsch)
- invistas en la perscrutaziun 2024 (cun cuntegns er en rumantsch)
- nossas contribuziuns per il Grischun
ulteriuras infurmaziuns
datotecas
- fhgr-news-jahresbericht-2023.jpgRapport annual 2023 da la SAS Grischun: Dapi 60 onns il center da furmaziun dal persunal qualifitgà da damaun
- fhgr-news-forschungsbericht-2024.jpgInvistas en la perscrutaziun 2024 da la SAS Grischun: En in temp, nua che la societad stat davant sfidas adina pli cumplexas daventa la colliaziun da la perscrutaziun scientifica cun l'applicaziun pratica adina pli impurtanta.
Scuola universitaria professionale dei Grigioni
Quale scuola universitaria intraprendente, la SUP Grigioni punta sul pensiero dinamico e sull’approccio proattivo. Con questo modo di pensare contribuisce a plasmare il futuro in modo sostenibile. L’insegnamento e la ricerca presso la Scuola universitaria professionale dei Grigioni sono interdisciplinari e orientati alle sfide pratiche nell’economia e nella società. La SUP Grigioni forma i suoi ben 2'400 studenti a diventare personalità altamente qualificate e responsabili. Essa offre cicli di studio e corsi di perfezionamento in Architettura, Ingegneria civile, Computational and Data Science, Digital Supply Chain Management, Information Science, Management, Mobile Robotics, Multimedia Production, Photonics nonché in Turismo. Nella propria ricerca, la SUP Grigioni si concentra sui temi delle tecnologie future applicate, dello sviluppo nell’area alpina e dell’attività imprenditoriale, agendo anche in modo partecipativo all’interno di laboratori reali. La partecipazione attiva di tutti gli attori della scuola universitaria contribuisce al continuo sviluppo della stessa nonché della qualità dell’intero l’istituto. fhgr.ch