Il success d’ina organisaziun dependa essenzialmain da sias persunas dal cader. L’abilitad da pensar a moda interdisciplinara, da motivar las collavuraturas ed ils collavuraturs e da communitgar confurm a la situaziun èn cumpetenzas decisivas da persunalitads da direcziun che ageschan cun success. La scolaziun da leadership cun certificat intermediescha precis questas abilitads cun declerar a moda chapaivla ils concepts centrals dal leadership. Sia finamira è da qualifitgar las participantas ed ils participants d’applitgar en lur manaschis ed instituziuns en differentas situaziuns la savida acquistada davart ils instruments e las metodas da direcziun. Ulteriurs cuntegns da la scolaziun èn la repartiziun da las resursas e la gestiun dal persunal, damai aspects centrals per dumagnar bain las incumbensas da planisaziun, da gestiun e da controlla. Uschia approfundeschan las participantas ed ils participants da la scolaziun cun certificat surtut lur enconuschientschas davart las metodas e las mesiras per il svilup da las collavuraturas e dals collavuraturs e dal team ed applitgeschan quellas a maun d’exempels. Ultra da quai emprendan ellas ed els las reglas fundamentalas da la communicaziun e vegnan scolad:as da manar cun success discurs constructivs cun las collavuraturas ed ils collavuraturs inclus discurs da feedback, da conflict e d’engaschament.  

Leadership sco factur da success per ils manaschis e per il cader 

Per garantir in’actualitad ed ina relevanza pratica maximala dals cuntegns collavura la SAS Grischun stretgamain cun ils suandants partenaris regiunals: Polizia chantunala dal Grischun, Servetschs psichiatrics dal Grischun, Gruppa Arena Alva e Viafier retica. Ier èn s’inscuntrads en la sedia da la SAS Grischun lur CEOs, commemb:ras da direcziun ed ulteriur:as represchentant:as dals partenaris e da la scola auta. Las persunas participadas han accentuà l’impurtanza da la scolaziun da leadership cun certificat, damai che la mancanza odierna da forzas qualifitgadas sa mussa er en ina mancanza da persunal da cader. Las instituziuns partenarias han chapì ch’ellas investeschan cun il perfecziunament da lur cader er en l’avegnir da lur interpresas.  

Per la segunda ediziun da questa scolaziun da leadership attractiva cun certificat per manaschis e persunalitads da cader pon interpresas ed instituziuns interessadas gugent annunziar lur participaziun. Il perfecziunament da management a la SAS Grischun è concepì uschia ch’ins po entrar sin differents nivels – tut tenor la furmaziun preliminara e l’experientscha professiunala correspundenta. Ultra dals curs professiunals sco la scolaziun da leadership cun certificat pon ins absolver scolaziuns fin ad in diplom da master executiv MBA. Ultra da quai vegn la paletta cumplettada dad offertas da perfecziunament spezialas per persunas che prestan servetsch militar.

Citats

• Tanja Hantke, participanta da la scolaziun da leadership, Viafier retica: «Grazia a la scolaziun da leadership cun certificat survegn jau sco commembra dal cader dapli segirezza per pudair agir a moda efficazia en differentas situaziuns da direcziun. Spezialmain prezius è il barat cun persunas dal cader d’autras interpresas.» 
• Reto Jegher, manader svilup da la furmaziun, Polizia chantunala dal Grischun: «La scolaziun cun certificat optimescha nossa gestiun dal persunal moderna. Il barat tranter las branschas è ultra da quai in enritgiment per noss cader.»
• Myriam Keller, manadra resursas, Servetschs psichiatrics dal Grischun: «Las persunas da cader dals PDGR sa movan mintga di en il champ da tensiun tranter augment da l’effizienza, controlla dals custs, dumonda da prestaziuns creschenta ed il persunal sco la pli impurtanta resursa. La pussaivladad da reflectar e da sviluppar l’atgna rolla directiva en la scolaziun cun certificat basada sin la pratica è enorm preziusa ed impurtanta.»
• Haempa Maissen, manader Human & Organizational Performance Management, Gruppa Arena Alva: «Nus da la Gruppa Arena Alva chapin leadership sco abilitad d’inspirar e da manar umans grazia a la creaziun da raits e la collavuraziun. Il barat e la collavuraziun cun autras persunas dal cader èn per nus essenzials, betg mo per navigar cun success en in ambient dinamic, mabain per pudair crescher ed emprender cuntinuadamain. En in mund globalisà vulain nus pussibilitar success sin nivel da l’interpresa sco era sin nivel persunal cun ina gestiun e promoziun efficazia da talents.» 
• Norbert Hörburger, manader da studi, Scola auta spezialisada dal Grischun: «Leadership reussì è l’abilitad d’esser in bun exempel, da crear ina visiun cuminaivla, da motivar e d’inspirar umans e da porscher segirezza e sustegn en situaziuns criticas. I sa tracta en emprima lingia da cuntanscher las finamiras da l’interpresa, ma era da cuntanscher finamiras persunalas cun promover las fermezzas individualas da mintgina e mintgin.»

Ulteriurs detagls

• Scolaziun da leadership cun certificat (en tudestg): fhgr.ch/leadershipkurs
• Purschida da perfecziunament en il sectur da management (en tudestg): fhgr.ch/management