569 persunas giuvnas cumenzan oz in studi da bachelor en architectura, Artificial Intelligence in Software Engineering, inschigneria da construcziun, economia da manaschi, Computational and Data Science, Digital Business Management, Digital Supply Chain Management, Information Science, Mobile Robotics, Multimedia Production, Photonics, management da sport e turissem – l'ultim tant per tudestg sco era per englais. Quai correspunda ad in augment da studentas e students da bachelor da otg pertschient en cumparegliaziun cun l'onn avant. Quest augment è stà pussaivel era grazia a 17 studentas novas e students novs dal studi da bachelor Artificial Intelligence in Software Engineering che la SAS porscha quest onn per l’emprima giada. Uschia rinforza la SAS Grischun ses portfolio cun in’ulteriura purschida da studi singulara en l’entira Svizra.

Er in studi da master consecutiv a la Scola auta spezialisada dal Grischun è fitg dumandà. Uschia sa spezialiseschan a partir dad oz 148 persunas en Data Visualization, Digital Communication and Creative Media Production, Engineering, New Business, Sustainable Business Development, Tourism and Change – che vegn manà en englais – ed User Experience Design. Tut en tut èn s’immatriculads quest atun bundant 1800 studentas e students a la SAS Grischun.

La SAS Grischun contribuescha a la cumpetitivitad dal chantun
«Jau hai grond plaschair che nossas purschidas da studi chattan tanta accoglientscha. Quai conferma che nossas purschidas innovativas correspundan als basegns da las studentas e dals students e da las interpresas», sa legra prof. Jürg Kessler, rectur e parsura da la direcziun da la scola auta. «Sco scola auta avain nus la finamira d’ans meglierar e d’ans sviluppar vinavant cuntinuadamain, era quai che pertutga noss studis existents.» La qualitad da la SAS Grischun sa sviluppia adina a favur da las studentas e dals students e dals partenadis da project, sco scola auta spezialisada persunala stettia numnadamain l’uman adina en il center da tut sias activitads. «Cun nossa attractivitad contribuin nus a la cumpetitivitad dal Grischun e gidain essenzialmain a reducir la mancanza da persunal qualifitgà ed ad augmentar la forza innovativa», resumescha il rectur Jürg Kessler.

Ulteriurs detagls

• purschida da studis da la SAS Grischun (mo per tudestg): fhgr.ch/studium