03.01.2023
La Scola auta spezialisada dal Grischun (SAS Grischun) è loscha da sia derivanza alpina. Il spiert da pionier, la solidaritad vivida sco era la cultura cun las trais linguas èn caracteristicas centralas da la DNA grischuna. Durant l'emprima perioda strategica sco scola auta spezialisada independenta cumplettescha ella ussa sia cumparsa cun il rumantsch ed il talian dasper il tudestg e l'englais d'enfin uss.
Pervi da sia posiziun davent da las metropolas è la SAS Grischun gia adina stada dumandada d'avair ideas e purschidas pli innovativas. La scola auta considerescha sco privilegi il svilup d'ideas pli «exigentas» en favur dal success. Dasper quest spiert da pionier han societads alpinas gia stuì sa fidar ina da l'autra en il passà e collavurar per pudair subsister en quest conturn. La solidaritad vivida e la cultura cun las trais linguas rumantsch, tudestg e talian èn caracteristicas essenzialas da la DNA grischuna. Da quai è la SAS Grischun loscha ed ella intermediescha questas valurs er a sias studentas e students ed a sias collavuraturas e collavuraturs.
Gia l'onn 2021 ha la SAS Grischun manà discussiuns cun la Lia Rumantscha e la Pro Grigioni Italiano ed ulteriuras instituziuns. A maun da quest barat ha la scola auta vulì eruir co ch'ella pudess integrar ils basegns da las duas regiuns linguisticas en las atgnas mesiras da communicaziun. Suenter han ins elavurà in concept areguard las linguas chantunalas e realisà midadas pass per pass. Ultra da l'inscripziun sin la porta d'entrada da l'edifizi principal e da diversas broschuras stattan uss a disposiziun era cuntegns da la pagina-web da la scola auta en rumantsch e talian. «Durant lur studi dain nus sin via a nossas studentas ed a noss students la DNA grischuna: il spiert da pionier e la valur da la plurilinguitad. Suenter quel temp duain ellas ed els esser cun ils pes sin terra e tuttina agils, ponderads e tuttina dinamics – bain equipads per concepir il futur a moda persistenta e curaschusa», accentuescha il rectur Jürg Kessler sia motivaziun da s'engaschar per las trais linguas chantunalas. Gia dapi plirs onns pon las studentas ed ils students sco era las collavuraturas ed ils collavuraturs da la SAS Grischun frequentar gratuitamain curs da rumantsch e talian.
Ulteriurs detagls:
- pagina-web en rumantsch: fhgr.ch/rm
- pagina-web en talian: fhgr.ch/it
La Scola auta spezialisada dal Grischun
Sco scola auta metta la SAS Grischun il focus sin in pensar dinamic ed in agir proactiv. Questa tenuta la gida a concepir l'avegnir a moda curaschusa e persistenta. La purschida da studis s’orientescha tenor las sfidas praticas da l’economia e da la societad. Cun sia offerta pussibilitescha ella a sias studentas ed a ses students, en tut passa 2200, da daventar persunalitads responsablas. La SAS Grischun porscha studis e perfecziunaments en ils roms «architectura ed inschigneria da construcziun», «medias, tecnica ed IT» sco er «economia, servetschs e scienza d’infurmaziun». En sia perscrutaziun interdisciplinara e transdisciplinara metta ella il focus sin ils temas tecnologias futuras applitgadas, il svilup en il spazi alpin e l'agir tenor princips d'interpresa. Cun sias activitads contribuescha la SAS Grischun al success ed a la cumpetitivitad da persunas, instituziuns e regiuns. Ella ha fermas ragischs en la regiun, è d’impurtanza naziunala ed irradiescha en l’entir mund. fhgr.ch