Dapi l’onn 2010 èn ils pretschs da transacziun per abitaziuns secundaras s’augmentads per passa 30%, quels per emprimas abitaziuns schizunt per passa 40%. Quai mussa in’evaluaziun da las datas rimnadas dal Swiss Real Estate fatga da la SAS Grischun. Il pli fitg è la dumonda creschida en il temp suenter l’erupziun da la pandemia da Covid-19: restricziuns da viadi, il boom da lavurar davent da chasa, ils models da temp da lavur flexibel (chavazzin «New Work») ch’èn sa fatgs valair ed il chapital spargnà sin fundament da las pussaivladads da consum restrenschidas durant quel temp han manà ad in veritabel boom da dumondas per abitaziuns secundaras. Questa dumonda augmentada fermamain sa mussa en ratas da creschientscha annualas da prest 9% durant ils onns 2020 e 2021 en il chantun Grischun.

Sch’ins cumpareglia il svilup dals pretschs da transacziun da las abitaziuns secundaras, sa mussan differenzas a l’intern dal chantun: La destinaziun Engiadina San Murezzan sa differenziescha areguard ils pretschs cleramain da las autras regiuns turisticas examinadas. I suondan las destinaziuns Tavau Claustra, Flem Laax e Lai cun pretschs auts cumparegliabels. Ils pli bass èn ils pretschs da transacziun ad Arosa. Era sch’ins po constatar durant la perioda da perscrutaziun 2010-2022 fluctuaziuns dals pretschs temporaras, sa mussa en tut las regiuns examinadas in augment dals pretschs massiv a partir da l’onn 2019.

Il squitsch sin il martgà d’emprimas abitaziuns crescha

La gronda dumonda sent’ins adina dapli er areguard las emprimas abitaziuns ed ils objects da locaziun. La procentuala d’abitaziuns vidas en tut la Svizra è uschè bassa sco dapi blers onns betg pli, las regiuns da muntogna èn pertutgadas il pli fitg da la stgarsezza d’abitaziuns. En consequenza concurrenzeschan las indigenas ed ils indigens cun las persunas estras bainstantas per las paucas purschidas sin il martgà d’abitaziuns stgars. En ils resultats s’exprima quai tras in’explosiun dals pretschs per emprimas abitaziuns en il chantun Grischun cun ina rata da creschientscha annuala da passa 17%, sch’ins cumpareglia l’onn 2021 cun l’onn 2022.

A curta vista na sa mussa nagina midada da tendenza. Che la situaziun tendida sin il martgà d’abitaziuns sa calmia il proxim temp para actualmain nunrealistic. Gist areguard l’aspect economic general cun ratas d’inflaziun s’augmentadas gist dacurt, tant tar las abitaziuns secundaras sco era tar las emprimas abitaziuns, ston ins quintar cun ulteriurs augments dals pretschs.

L’Institut per turissem e temp liber (ITF) ha sviluppà durant blers onns sias cumpetenzas en il champ da perscrutaziun management d’infrastructuras turisticas. Surtut quai che pertutga l’alloschament turistic è l’institut da la SAS Grischun in partenari da contact professiunal ed independent. L’institut è in’organisaziun partenaria da l’Uffizi per economia e turissem (UET) ed elavura per incumbensa da tal regularmain rapports areguard las consequenzas da la legislaziun davart las abitaziuns secundaras, uschia er en il rom dal monitoring concernent il svilup dals pretschs d’abitaziuns secundaras.
 

Dapli detagls:

• Il rapport da perscrutaziun
• Ulteriuras publicaziuns davart la lescha d’abitaziuns secundaras: fhgr.ch/zweitwohnungsgesetz