Ina retschertga en la branscha mussa quant urgent che quest project è: las barrieras principalas per realisar ideas innovativas èn l'experientscha minima, las resursas limitadas ed il sustegn local mancant. «Ideefix» prenda en mira precis quests puncts cun offrir utensils pratics ed agid direct per surmuntar tals obstachels.

Empè d'accumpagnar sco fin qua a lunga vista projects cun sustegn extern, duai il project «Ideefix» gidar ils acturs en il turissem da sviluppar, testar ed introducir in product u ina purschida cun l'atgna forza en pauc temp. Grazia a questa moda da proceder pon ils acturs turistics prender per mauns e realisar en l'avegnir sezs temas ed ideas.

Manual e coaching
L'element central dad «Ideefix» è in manual structurà ch'è accessibel libramain. El mussa a furnituras e furniturs da prestaziuns turisticas ed a destinaziuns da spargnar custs e minimar ristgs. Il manual descriva co pigliar per mauns ideas da project, las modellar sco prototipas, las testar e per finir las realisar. Sco basa per sviluppar il manual han servì enconuschientschas da trais exempels d'applicaziun da las organisaziuns turisticas da Bravuogn Filisur, Bregaglia e Viamala.

La purschida cumpiglia dapli che mo il manual dad «Ideefix». Sin giavisch pon persunas interessadas profitar da lavuratoris moderads e d'in accumpagnament cumplessiv extern tras l'entir process. Per lantschar «Ideefix» dattan webinaris gratuits il 1. ed ils 14 da matg in'invista pli profunda e la pussaivladad da sa barattar directamain cun partenaris cumpigliads.

Quest project è ina cooperaziun tranter l'Institut per turissem e temp liber (ITF) da la SAS Grischun, da Grischun Vacanzas e gutundgut GmbH, sustegnì dad Innotour, l'instrument da promoziun dal Secretariat da stadi per l'economia SECO.

Ulteriurs detagls

• Project «Ideefix simplifitgescha da realisar ideas»  (en tudestg)
• Webinaris (en tudestg)

Ulteriuras infurmaziuns

Dominik Knaus 
manader da l'Institut per turissem e temp liber, SAS Grischun
dominik.knaus@clutterfhgr.ch  
+41 81 286 37 88

Luzi Bürkli
manader da la communicaziun d'interpresa, Grischun Vacanzas
luzi.buerkli@cluttergraubuenden.ch  
+41 81 254 24 35

Rafael Enzler 
gutundgut GmbH
rafael.enzler@cluttergutundgut.ch   
+41 44 260 80 51

La Scola auta spezialisada dal Grischun
Sco scola auta agila furman il pensar dinamic e l'agir proactiv las lingias directivas da la SAS Grischun. Cun questa tenuta contribuescha ella cun persistenza a la concepziun da l'avegnir. Il studi e la perscrutaziun èn interdisciplinars e s'orienteschan tenor las sfidas praticas da l'economia e da la societad. Cun sias purschidas da scolaziun pussibilitescha ella a sias studentas ed a ses students, en tut sur 2300, da daventar persunalitads fitg qualifitgadas e responsablas. La scola auta porscha studis da bachelor e master sco era perfecziunaments en ils roms architectura, inschigneria da construcziun, Computational and Data Science, Digital Supply Chain Management, Information Science, Management, Mobile Robotics, Multimedia Production, Photonics e turissem. En sia perscrutaziun focussescha ella sin las tematicas tecnologias futuras applitgadas, svilup en il territori alpin ed agir d'interpresa ed ella participescha er a laboratoris reals. La participaziun da tut las commembras e da tut ils commembers da la scola auta contribuescha al svilup da la scola auta spezialisada e da sia qualitad. fhgr.ch/rm 

Grischun Vacanzas
Grischun Vacanzas è l'organisaziun da marketing turistica dal chantun Grischun. Ensemen cun partenaris ha Grischun Vacanzas la finamira dad attrair dapli giasts en il Grischun per pudair crescher a moda qualitativa. Per quest intent orientescha Grischun Vacanzas sia strategia consequentamain ad activitads ch'includan pliras destinaziuns, ch'èn datiers da la commerzialisaziun ed orientadas als giasts. L'effect cumplementar da Grischun Vacanzas ad activitads d'organisaziuns turisticas e da differents acturs turistics stat en il center da la strategia da Grischun Vacanzas. graubuenden.ch

 
gutundgut GmbH
La gutundgut GmbH cun sedia a Lenzburg e Rotterdam è spezialisada sin il management da projects cumplexs e svilups da products per il turissem, il temp liber e la cultura. gutundgut concepescha, pensa e lavura cun persvasiun en pliras dimensiuns. Turissem, architectura, cultura e communicaziun cumplimenteschan in l'auter en projects sco er en il team. gutundgut lavura cun la metoda da placemaking che sa basa sin la chapientscha profunda dal lieu en tut sias fassettas. Furnituras e furniturs da prestaziuns e la populaziun vegnan integrads activamain en ils projects; purschidas disponiblas, l'infrastructura ed il conturn vegnan resguardads da l'entschatta ennà. Uschia naschan sin basa da valurs existentas projects e lieus d'in caracter unic ch'èn entretschads localmain e che han ina perspectiva persistenta. gutundgut.ch