Per ideas innovativas e creativas sin il sectur da las furmas d'alloschament flexiblas na datti prest nagins cunfins. La paletta da lieus e d’equipaments è gronda e permetta ina concepziun individuala, uschia che la purschida sa preschenta multifara e pledenta (medemamain) in grond spectrum da gruppas en mira.Ils alloschis flexibels tanschan da tendas e vehichels fin a furmas che sumeglian chasas e quai sin la terra, sin l'aua ed en l'aria. Il studi ha gì la finamira da cumpilar ina tipologia e d'elavurar ina survista da las purschidas da Flexlodge existentas en il chantun Grischun, d'eruir il potenzial turistic da las furmas d'alloschament flexiblas e far recumandaziuns co trair a niz quest potenzial.

Boom da las purschidas d'alloschament singularas

Ils resultats dal studi mussan cleramain che furmas d'alloschament flexiblas èn fitg popularas tar ils giasts. Savens èn las purschidas reservadas entaifer pauc temp u gia ditg ordavant. Pli singulara e spectaculara che la purschida sa preschenta e pli gronda ch'è la prontezza da pajar dapli persuenter: il numnader communabel dals giasts plitost activs che van gugent giuador è il giavisch da pernottar en in lieu nov ed unic che sa distingua da la purschida da standard dals hotels e da las abitaziuns da vacanzas e porscha la chaschun da passentar temp en la natira. Ultra da la singularitad da l'alloschi influenzescha pia er il lieu spezial ed attractiv a moda centrala la concepziun da la purschida. Era per las persunas che dattan alloschi è il trend fitg legraivel. Quai ha pliras raschuns: las novas furmas d'alloschament furneschan material illustrativ perfetg per l'inscenaziun mediala e communicativa e pussibiliteschan da trair a niz funtaunas da svieuta supplementaras e da reagir pli flexiblamain en fasas d'interess fitg grond. Ils custs d'investiziun pli bass per unitad da pernottaziun da questas novas furmas d'alloschament cumpareglià cun l'alloschament staziunar en l'hotel u en abitaziuns da vacanzas sugereschan ina meglra relaziun tranter ils custs ed il retgav. Pia datti en quest segment bleras schanzas per ideas da fatschenta interessantas ed innovativas – era per alloschadras ed alloschaders che fan quest pass per l'emprima giada.

Potenzial per ideas da fatschenta innovativas

Il studi preschent mussa che la schanza per sviluppar vinavant la purschida d'alloschaments flexibels en la branscha turistica dal Grischun è da principi avant maun. Ma il potenzial vegn oz strusch tratg a niz. Tranter auter ha quai da far cun l'orientaziun insuffizienta per purschidras e purschiders potenzials ed activs d'alloschaments flexibels. Abstrahà dal fatg che la pussaivladad da porscher alloschaments flexibels è anc memia pauc enconuschenta, èsi per purschidras e purschiders futurs difficil da s'orientar en la legislaziun da la planisaziun dal territori e d'auters secturs. Che la purschida na vegn betg explotada meglier malgrà la dumonda adina pli gronda per furmas d'alloschament flexiblas, ha da far tranter auter cun la communicaziun da la purschida: la tschertga da purschidas è greva per giasts pussaivels – pervia da la mancanza da noziuns e plattafurmas standardisadas na chatt'ins ellas betg tgunsch u mo per casualitad. Las recumandaziuns d'agir elavuradas en il rom da quest studi tractan gist questas sfidas e dattan paisa als suandants champs: elavurar cundiziuns da basa, promover cooperaziuns tranter las acturas ed ils acturs involvids, metter a disposiziun infurmaziuns e commerzialisar la purschida.

Purschidas augmentan l'attractivitad da la regiun turistica

Il Cussegl turistic dal Grischun ha intimà quest studi da basa per evaluar ils potenzials turistics en il Grischun e svilups actuals suenter la pandemia da Covid-19. L'Institut per temp liber e turissem da la SAS Grischun ha survegnì l'incumbensa correspundenta da l'Uffizi per economia e turissem dal Grischun (UET). «Purschidas da pernottaziun spezialas che cumpletteschan las furmas d'alloschament classicas pon render pli attractiva ina regiun turistica, era sch’i sa tracta da purschidas da nischa», di Reto Bleisch, manader da l'UET. Ina meglra visibilitad da talas purschidas saja impurtanta per lur success.

L'Institut per temp liber e turissem contribuescha cun sia perscrutaziun applitgada e ses projects da svilup damanaivel da la pratica a l'ulteriur svilup dal turissem. En spezial il process da revitalisaziun dal turissem svizzer e grischun vegn accumpagnà activamain. Per quest intent s'occupa l'institut en sia perscrutaziun cun l'innovaziun da servetschs, il turissem 4.0, il management d'immobiglias e d'infrastructuras turisticas sco era cun il svilup persistent. Partenarias e clientas da la SAS Grischun èn destinaziuns, purtadras da prestaziuns, associaziuns, la politica e l'administraziun. Da cuminanza vegnan elavuradas soluziuns per dumondas che pertutgan las interpresas, la societad e la politica sin il sectur dal turissem e dal temp liber.

Ulteriurs detagls:

• project Flexlodges – novas furmas d'alloschament flexiblas (cun il studi da basa per telechargiar)