Adina pli paucs uffants fan en il Grischun, il chantun da sport d'enviern classic, sport da naiv resp. da skis e la relaziun cun quest «bain cultural» è en privel dad ir a perder. Cun la finamira d'entusiasmar las scolarettas ed ils scolarets per il sport d'enviern han lieu en il Grischun mintg'onn emnas da sport da naiv per las scolinas. Las classas sa rendan ensemen cun lur persunas d'instrucziun per in'emna mintga di en in territori da skis. La SAS Grischun ha evaluà per incumbensa da graubündenSport las emnas da sport da naiv per las scolinas dals onns 2022 e 2023 e rimnà resultats custaivels. Il project è vegnì sustegnì indirectamain era da l'Uffizi federal da sport.

Buna organisaziun grazia a cooperaziun ed experientschas da blers onns

L'evaluaziun da las respostas da las mussadras e dals mussaders durant las stagiuns  2021/22 e 2022/23 mussa ch'ils process organisatorics en connex cun las emnas da sport da naiv vegnan realisads tut en tut bain. Las experientschas fatgas durant blers onns ed il sustegn vicendaivel da las persunas participadas giogan qua ina rolla impurtanta. Tenor las persunas d'instrucziun è il temp impundì survesaivel, cumbain ch'i dat en quest punct tschertas differenzas tranter las scolinas.

Surtut dat en egl che la gronda part da las persunas d'instrucziun (73% resp. 80%) preferescha in program dad in mez di. Quai mussa che las mussadras ed ils mussaders tegnan quint dals basegns dals uffants e ch'ellas ed els èn conscients dal fatg che fasas pli lungas sin la naiv pon muntar strapatschs supplementars. Las persunas d'instrucziun cumbineschan cun success cuntegns d'instrucziun cun l'emna da sport da naiv u prevesan per l'avegnir pussaivladads correspundentas.

Durant l'emna da sport da naiv percepescha la maioritad da las persunas d'instrucziun il cumportament ed il stadi emoziunal da las scolarettas e dals scolarets sco activ, sveglià e ventiraivel. Quai pleda per in'atmosfera positiva e legraivla durant las activitads. Las persunas d'instrucziun dattan impuls prezius per meglierar il program. Quai cumpiglia in access facilità a persunas d'assistenza, in sustegn finanzial pli grond ed ina collavuraziun main cumplitgada cun las scolas da sport da naiv.

Per finir pon ins constatar che las emnas da sport da naiv èn in'experientscha positiva per las scolarettas ed ils scolarets che vegnan organisadas ed accumpagnadas da persunas d'instrucziun engaschadas. Il grond dumber da respostas è in indizi supplementar per l'interess e la cuntentientscha da las persunas d'instrucziun cun quest program.

Ils uffants da scolina rimnan experientschas positivas cun il sport da naiv

Discurs cun tut en tut quatter gruppas da scolarettas e scolarets han mussà ch'ils uffants percepeschan il temp or en la natira ed en las muntognas sco bel ed aventurus. Ils uffants han plaschair d'emprender differents stils dad ir ed els applitgeschan las instrucziuns correctamain tut tenor situaziun e pretensiun. Sentir il success sin la pista e cun far diever dals meds da transport è insatge fitg impurtant. La cursa da skis è per blers uffants il punct culminant da l'emna. In u l'auter n'ha betg gugent la structura fixa durant l'emna, entant che auters giaudan il temp ch'els pon passentar cun lur conscolarettas e conscolarets. Igl è evident che la gronda part dals uffants è abla d'approfundar las cumpetenzas existentas u d'acquistar novas abilitads. Blers uffants vulan cuntinuar da far sport da naiv er ordaifer las structuras da la scolina. La gronda maioritad vuless prest puspè absolver in'emna da sport da naiv cun la scolina.

Las constataziuns da l'evaluaziun porschan a graubündenSport ina basa per realisar meglieraments organisatorics e l'ulteriur svilup da las emnas da sport da naiv. Quai conferma er il manader da graubündenSport, Thierry Jeanneret: «La SAS dal Grischun è stada per nus ina partenaria da barat optimala per generar resultats fundads tenor criteris scientifics e da deducir sin fundament da quels opziuns d'agir per la promoziun futura da las emnas da sport da naiv sin il stgalim prescolar.»

Ulteriurs detagls:

• pagina dal project ed il studi (en tudestg): colliaziun
• studi da bachelor Sport Management (en tudestg): fhgr.ch/sportmanagement