Il servetsch da milissa tar ils pumpiers ed en la protecziun civila è in element impurtant da la protecziun da catastrofas e da la populaziun en Svizra. Engaschis en il rom da la crisa da corona, en connex cun la bova da crappa a Bondo, ils incendis da guaud en la Mesolcina sco er en il rom d'eveniments pli pitschens dal mintgadi han adina puspè fatg vegnir conscienta la gronda part da la populaziun da las plivalurs da las duas organisaziuns. Per mantegnair quest sistem prezius per il futur è la populaziun per l'ina avisada che las persunas activas en il sectur da milissa possian quintar cun ina buna collavuraziun cumprensiva cun lur patrunas e patruns e per l'autra ch'ins chattia entaifer las organisaziuns da milissa avunda persunal da cader. La scola auta spezialisada dal Grischun SASGR ha realisà ensemen cun l'Assicuranza d'edifizis dal Grischun e cun l'Uffizi da militar e da protecziun civila dal chantun Grischun in'enquista chantunala da commembras e commembers dals pumpiers e da la protecziun civila per examinar mesiras concretas.

Las datas dal studi preschent mussan che la cumpatibilitad da professiun ed activitad da milissa è da princip dada. Las commembras ed ils commembers da la protecziun civila percepeschan la sfida sco in pau pli gronda che las commembras ed ils commembers dals pumpiers. La cumpatibilitad da famiglia e temp liber è per gronda part dada tant per las commembras ed ils commembers dals pumpiers sco era per las commembras ed ils commembers da la protecziun civila. 

La cuntentientscha è gronda, il sustegn en il mund da lavur sa sminuescha

Dus terzs da las persunas dumandadas tar ils pumpiers survegnan sustegn da lur patruna u patrun. Tar la protecziun civila è quai var in terz. Las furmas da sustegn sa manifesteschan tar omaduas gruppas da l'enquista a moda sumeglianta: il pli grond sustegn è la lavur parziala ed ils temps da lavur flexibels. En pli èn ils impediments administrativs pitschens, perquai ch'ins sto strusch far cunvegnas en scrit. Las patrunas ed ils patruns èn savens culants. La cuntentientscha cun la patruna u il patrun da lavur areguard la promoziun da l'engaschi da milissa è buna fin fitg buna e quai tant da vart da las commembras e dals commembers dals pumpiers sco era da la protecziun civila. Las persunas dumandadas che fan part da truppas da pumpiers attribueschan a lur engaschi er in effect positiv per lur schanzas d'engaschament en cas d'ina midada da plazza. Las persunas che fan protecziun civila vesan quai a moda pli neutrala – damai ni a moda positiva ni negativa.

L'encuraschament da vart da la patruna e dal patrun è però remartgablamain bass: mo stgars 20 pertschient da las commembras e dals commembers dals pumpiers e 10 pertschient da las commembras e dals commembers da la protecziun civila èn vegnids encuraschads proactivamain da lur patrunas u patruns per lur engaschi actual u per in ulteriur engaschi. 

Il servetsch da milissa dovra dapli persunal da cader e dapli dunnas ... 

Ils pumpiers organisads communalmain en il chantun Grischun èn posiziunads bain quai che reguarda il persunal cun in dumber da commembras e commembers actual da ca. 4'000. Tuttina è la recrutaziun da persunal da cader ina sfida – spezialmain en las regiuns periferas. La protecziun civila – cun in dumber da commembras e commembers actual da ca. 2'300 – è confruntada en il futur cun in'eventuala mancanza da persunal pervi d'adattaziuns en la Lescha federala davart la protecziun da la populaziun e davart la protecziun civila. Perquai è la recrutaziun da persunal da cader d'impurtanza particulara era per la protecziun civila. Il medem mument sa differenzieschan fermamain las premissas per la recrutaziun da voluntarias e voluntaris en il servetsch da pumpiers ed en il servetsch da la protecziun civila: la prontezza da s'engaschar supplementarmain a moda voluntara è pli auta tar ils pumpiers, tar las persunas che fan protecziun civila vegn in tal engaschi en dumonda mo per ina pitschna minoritad. L'analisa mussa era: surproporziunalmain blera glieud dal cader dals pumpiers e da la protecziun civila han ina funcziun da direcziun er en l'activitad professiunala. Quai pudess avair in connex cun il fatg che glieud engaschada na s'engascha savens betg mo en in sectur da la vita – quai è ina schanza tant per l'economia sco era per las organisaziuns da milissa.

Per render l'engaschi pli attractiv e per augmentar l'interess per il servetsch da cader èn las persunas dumandadas s'exprimidas particularmain en favur da tschertas mesiras: meglierar la remuneraziun finanziala considereschan commembras e commembers dals pumpiers e da la protecziun civila sco in dals meds ils pli effizients per promover l'attractivitad da l'engaschament. Gist en la protecziun civila datti en quel reguard sco ch'i para in basegn da recuperaziun. Surdar bons per perfecziunaments e cunzunt imputar il servetsch prestà sin ils perfecziunaments (p.ex. en furma da puncts ECTS per programs d'universitads e da scolas autas spezialisadas) – per quai mussan las persunas dumandadas gronda simpatia. Plinavant s'expriman a moda positiva las commembras ed ils commembers da la protecziun civila per in'integraziun pli intensiva da las dunnas ed era – pli moderadamain – da persunas estras cun domicil en il Grischun. Per garantir il servetsch dals pumpiers e da la protecziun civila en il futur sto vegnir examinà concretamain co ch'ins po recrutar meglier dunnas e co ch'ins pudess avrir resp. render pli enconuschent il servetsch a persunas da l'exteriur.

Ulteriurs detagls: 

•    Project da perscrutaziun «PoliWork»
•    Champ da perscrutaziun activitad da milissa e da lavur voluntara

Ulteriuras infurmaziuns: 

Dario Wellinger  
manader da project 
Scola auta spezialisada dal Grischun 
+41 (0)81 286 39 36
dario.wellinger@clutterfhgr.ch

Martin Bühler directur  
Uffizi da militar e da protecziun civila
+41(0)81 257 35 22
martin.buehler@clutteramz.gr.ch

Markus Feltscher 
directur  
Assicuranza d'edifizis dal Grischun
+41 (0)81 258 90 01
markus.feltscher@cluttergvg.gr.ch