Grazia a la revisiun parziala da la Lescha davart las scolas autas e la perscrutaziun
20.06.2024
En la sessiun dal zercladur ha il Cussegl grond approvà unanimamain la revisiun parziala da la Lescha davart las scolas autas e la perscrutaziun. La Scola auta spezialisada dal Grischun ha plaschair da quest votum cler e dal sustegn da la politica per crear meglras cundiziuns da basa per las scolas autas e las instituziuns da perscrutaziun.
La regenza grischuna ed il Cussegl grond reageschan sin la concurrenza adina pli gronda tranter las scolas autas en Svizra e sur ils cunfins naziunals ora. Uschia è la revisiun parziala da la Lescha davart las scolas autas e la perscrutaziun vegnida approvada cun 104:0 vuschs affirmativas e naginas abstenziuns. «Nus essan fitg engraziaivels per il sustegn dal Cussegl grond che pussibilitescha a la SAS Grischun da sa sviluppar vinavant», di prof. Jürg Kessler, rectur e parsura da la direcziun da la scola auta. La revisiun parziala dat al cussegl da la scola auta la cumpetenza da dar liber novs roms da studi – quai che ha pudì far fin ussa mo la Regenza. Grazia a la revisiun parziala po la SAS Grischun en pli avrir novs champs spezials – sco per exempel il champ da sanadad ch'è previs sco punct central da svilup strategicamain impurtant – e cumenzar cun in nov rom da studi da bachelor en tgira. Da nov èsi numnadamain pussaivel da lantschar ultra da roms da studi da bachelor e da master en tecnica ed economia era roms da studi da champs spezials d'ina autra tematica. La Regenza sto dentant vinavant dar ses consentiment per ils novs champs spezials sco tals. «In studi da scola auta cumpiglia ultra da la scolaziun adina era perscrutaziun, servetschs e perfecziunament. E quai è il grond merit da questa revisiun parziala – che la cumpetenza per ils novs roms da studi vegn transferida al cussegl da la scola auta e che la SAS Grischun po avrir ulteriurs champs spezials», declera prof. Jürg Kessler. Uschia sco quai ch'igl è era vegnì giavischà da vart da la politica grischuna e da la publicitad.
Cun la Lescha davart l'agid a las scolas autas e lur coordinaziun s'orientescha l'entir spazi da las scolas autas da la Svizra dapi il 2015 a la concurrenza e la cooperaziun da tut las scolas autas svizras, quai vul dir da tut las universitads, las scolas autas da pedagogia e las scolas autas spezialisadas. Cun deliberar la revisiun parziala da la Lescha davart las scolas autas e la perscrutaziun chatta questa chapientscha ina cuntinuaziun sin stgalim chantunal. L'adattaziun conceda a la SAS Grischun dapli spazi d'agir, cumpetenza da decider, agilitad ed autonomia – e segirescha uschia la cumpetitivitad da la SAS Grischun.
Ulteriurs detagls
ulteriuras infurmaziuns
